حرب الكورونا

بسم الله الرحمن الرحيم 

من شوربة خفافيش لأزمة في المناديل لامؤاخذه التواليت ، كائن ضئيل جدا مدوخ العالم كله فعلا على رأي المثل صغير بس يحير ، السعودية موقفه رحلاتها من والى المملكة ده غير بعض البلاد سواء العربية او الاروربية الي فرضت حظر التجوال والاغلاق التام على نفسها بسبب ارتفاع حالات الإصابة فيها ، والدراسة والجامعات متأجلين لأجل غير مسمى والناس في حالة ذعر وبتجري تشتري وتتسوق بكل قوتها فرضا منهم انهم كدا بيتشعلقوا بطوق النجاة.

وكل واحد ظريف عمال يشرب مكان واحد تاني ظريف زيه ولا كأنكم عايشين معانا على الكوكب.

فيروس الكورونا وباء عالمي واللي أسوأ من كدا هو الإستهتار والجهل بفيروس كورونا ، خلينا نتكلم شويه جد بقا.

فيروس كورونا هو وبلا شك الموضوع اللي شاغل العالم ، هل الفيروس بالخطورة دي واللي الإعلام محسسنا بيها وهل فيروس كورونا هوه نهاية العالم ، منظمة الصحة العالمية بعد ما أعلنت انه وباء عالمي والعالم كله أصبح في ذعر وخوف شديد ولازم ناخد احتياطات جدية لتفادي فيروس كورونا.

فيروس كورونا Covid-19 وده اختصار لــ COrona VIrus Disease 2019 ، مرض فيروس كورونا اللي انتشر في سنة 2019.

طب أعرف ازاي عندي برد عادي  ولا كورونا وطبعا اكذب عليك لو قولتلك انا اعرف بس الفروقات صعب تتعرف لشخص مش متخصص في مجال تشخيض الأمراض ومش أي التهاب في الحلق او سيلان في الأنف يبقى فيروس كورونا وده ممكن يكون دور برد عادي جدا والانفوجراف ده بيوضح الفرق خلينا نشوف :

وطبعا كلنا سمعنا عن موضوع انك تمسك نفسك لمدة 20 ثانيه والكلام ده غير صحيح ومش عشان مش عارف اخد نفسي يبقى كدا عندي كورونا وصلت !! 

طيب احتمال اصلا ميظهرش أعراض ولو ظهر تكون بسيطة ووفقا لمنظمة الصحة العالمية ان 80% من المصابين أعراض المرض غير شديدة / غير موجودة و 20 % التانين حالتهم شديده وصعبه شويه والفكره هنا ان كل ما كان جهاز المناعة بتاعك ضعيف كل ما أنت معرض اكتر للأعراض تشتد عليك سواء بقا فيروس كورونا او بكتريا.

طيب ايه الحل في فيروس كورونا (الوباء العالمي ده)  ايوه هيه الوقاية وده اللي هنتكلم عنه : 

الاعتناء بنفسك واول حاجه طبعا منلمسش وشنا نحاول جاهدين نتجنب العادة دي لو سمحتوا ونغسل ايدينا بالماء والصابون كويس جدا عشان نوصل لكل حته في ايدينا ولو انت برا ومش متوفر الماء والصابون نستخدم المطهر الي فيه نسبة كحوليات عالية بس لما ترجع حاول جاهدا تغسل ايديك وتحاول تلبس ماسكات مع انه مش مهم اوي الا في حالة لو انت مصاب بالبرد. طيب الاسطح في البيت عندك زي ايه .. نحاول ننظف اوكر الابواب او الترابيزات وكمان الموبايل بس عارف هتنضف بإيه بالظبط معلقتين كلور على لتر ماء كفايه للتطهير ان شاء الله. طب اللي يقولك اشرب مايه كتير او اتمضمض بماية بملح  والكلام ده ملهاش أي دليل انها بتعمل حاجه للكورونا.

نبطل ناكل من برا والدليفري والذي منه مش عشان الأكل من برا مش مفيد ، لكن ايه اللي يضمنلك ان اللي بيعملك الأكل عنده كورونا ولا لا !! 

فكرة التباعد الإجتماعي مهمة جدا لأن لو شخص واحد مصاب اتعامل مع كام واحد او راح حفله وعدى عشرين واحد والعشرين دول عدوا عيلتهم لك ان تتخيل المصيبه اللي هنكون فيها وهنخلي سرعة انتشار فيروس كورونا بنسبة كبيره جدا ودي الفكره من التباعد اننا نقلل من انتشار المرض.

والكورونا مش برد يا جماعة والموضوع لا يدعوا للقلق لو عملنا اللي علينا والتزمنا التعليمات وأسوأ حاجه تعملها دلوقتي هيه الاستهتار وده بيجي نتيجة للجهل.

كل الشكر الواجب لــ 

ايجيكولوجي يوتيوب

#بلاش_إستهتار

#اقعد_في_بيتك

الوسوم: #اقعد_في_بيتك #بلاش_إستهتار الصحة العقلية فيروس كورونا كورونا منوعات